Израиль Сыртқы істер министрлігі «MASHAV» халықаралық орталығында «Агрономия және орман шаруашылығы» кафедрасының 4 оқытушысы «Суару мен өсімдіктерді қорғаудың озық технологиялары» тақырыбында кәсіби дайындықтан өтті.
Бұл курсқа Солтүстік Қазақстан облысынан 11 адам қатысты. Олар ауыл шаруашылығы тауарын өндірушілер, мұғалімдер мен ауылшаруашылық құрылымдардың өкілдері. 10 күндік тренингте теориялық және практикалық сабақтар Израильдегі экскурсиямен ұштастырылды.
Бағдарлама аясында тамшылатып суарудың принциптері мен жүйелері, өсімдіктерді кешенді қорғау туралы қызықты дәрістер тыңдалды. Қысыммен суару әдістері, зиянкестермен күресу, жылыжайларды жобалау, сондай-ақ, ауыл шаруашылығы өнімдерін өсіру, оны сақтау және өңдеу әдістері және тағы басқа да мәселелер зерттелді.
Қозыбаев университетінің профессорлары студенттерге «Өсімдік шаруашылығы», «Ауыл шаруашылығы» және «Топырақтану» академиялық пәндері аясында жинақталған тәжірибемен бөлісуді жоспарлап отыр.
