2018 жылдың 28 қазанында М.Қозыбаев атындағы СҚМУ-да «Қазақ халқының неміс ұлы» атты аймақтық ғылыми-тәжірибелік конференция өтті. Жиын көрнекті жазушы, сыншы, журналист, публицист және қоғам қайраткері Герольд Бельгердің 84 жылдығына арналды. Конференцияда «Немістердің Солтүстік Қазақстанға жер аудару тарихы», «Герольд Бельгердің Қазақстан мәдениетіне қосқан үлесі» тақырыбында баяндамалар оқылды. Бұдан бөлек, іс-шарада студенттерге жазушының өмірі жайлы деректер айтылып, оның шығармашылығы сөз болды.
Жиын барысында «Wiedergeburt» немістер кеңесі РҚБ төрағасы Александр Дедерер қаламы ұшқыр азаматтың туған өлкесіне жазған хатын оқып, Герольд Бельгердің өмірбаянына тоқталды.
Сонымен қоса, шараға ат салысқандардың бірі дара тұлғаның жазған кітаптары туралы баяндаса, басқалары оның журналистік және публицисттік қасиеттері жайлы сөз етті.
