Қозыбаев университеті мен «Soilephone» ЖШС ынтымақтастық туралы келісімге қол қойды. Келісім шеңберінде университет сотталғандар үшін ЖИ негізіндегі заң кеңесшісін әзірлейді. Жобаның мақсаты-  қылмыстық-атқару жүйесі мекемелерінде сотталғандардың құқықтық ақпаратқа тең, қауіпсіз қолжетімділігін қамтамасыз ету. Осыған дейін «Soilephone» ЖШС мамандары қауіпсіз байланыс платформасын- бейнетаксофондарды жасап, енгізген. ҚАЖ-да мобильді құрылғыларға тыйым салу әлеуметтік оқшаулануды арттырады. Бейнетаксофондар бұл мәселені шешуге және сотталғандардың құқықтарын қамтамасыз етуге арналған. Қозыбаев университетімен бірлескен әзірлеменің арқасында сотталғандар бейнетаксофондар арқылы құқықтық ақпаратқа қол жеткізуге және бейімделген нысанда заңнама нормаларын түсіндіруге қосымша мүмкіндік алады. Бұл құқықтық сауатсыздықты және қақтығыстарды азайтуға көмектеседі. ЖИ кеңесші: 1. Төмендегідей ақпарат береді:* қылмыстық,* қылмыстық-атқару,* азаматтық,* әкімшілік заңнама* өтінім үлгілерін ұсынады (заңды өкілдіксіз). 2. Төмендегідей рәсімдерге түсініктеме береді:* шағымдар мен өтініштер беру;* шартты түрде мерзімінен бұрын босату;* басқа тергеу шарттарына  ауыстыру;* кездесулер мен хабарламалар алу. «Бұл әлеуметтік маңызды жоба көптеген адамдарға көмектеседі деп үміттенемін. Биыл біз коммерцияландыруға өңірдің кәсіпорындарымен шамамен жеті жоба ұсындық. Біздің көмегімізбен өндірістік қуаттарын арттырып, ғылыми идеяларын жүзеге асыра алады», - деді Басқарма Төрағасы – Ректор Ербол Исақаев. Жобаны іске асыру барысында нормативтік базаға талдау жүргізіледі, сәулеті жобаланады және MVP әзірленеді, сондай-ақ ҚАЖ мекемелерінің бірінде пилоттық жоба іске қосылады.

Университетімізде  «Әділетті және Прогрессивті Қазақстанның Халықтық Конституциясы үшін» Жалпыұлттық коалициясының СҚО филиалының өкілдерімен, студент жастармен және ЖОО белсенділерімен алдағы конституциялық реформаларды талқылауға арналған диалог алаңы ұйымдастырылды. Жалпыұлттық коалициясының СҚО филиалының өкілі Жадыра Жолкенованың айтуынша  қоғамның болашақ дамуы үшін студенттердің көзқарастары мен ұсыныстарына назар аудару қажет: «Бүгінде  біз жастарға үлкен үміт артып отырмыз. Ең алдымен білім алушылар өздерінің құқықтарын біліп жүрсе деймін. Жаңа Конституция – белсенді, жауапты әрі саналы азаматтарды қалыптастыруға бағытталған. Сондықтан жас ұрпақ заңға құрметпен қарап, мемлекеттің дамуына өз үлесін қосуға дайын болуы тиіс». Университеттік ортада құқықтық мәдениет, азаматтық жауапкершілік және жастардың белсенді өмірлік ұстанымы қалыптасады. Сондықтан ел дамуының негізгі бағыттарын академиялық ортада талқылау ерекше маңызға ие. «Жоғары оқу орны – тек білім беру мекемесі ғана емес, сонымен қатар құқықтық мәдениет пен азаматтық бірегейлік қалыптасатын орта. Біздің басты міндетіміз – білімді маман даярлаумен қатар, заң мен әділеттілік қағидаттарына сүйене отырып, ойлап, талдау жасай алатын және жауапты шешім қабылдай білетін тұлғаларды тәрбиелеу»,- деді Басқарма Төрағасы- ректор Ербол Исақаев Негізгі баяндамалардан кейін сұрақ-жауап бөлімі ұйымдастырылды.Кездесу барысында жаңа Конституция аясындағы өзгерістер жан-жақты қарастырылып, білім алушылардың пікірлері тыңдалды.

Бүгінгі таңда университет дамуының стратегиялық маңызды бағыттарының бірі-жоғары білім беруді халықаралық деңгейге көтеру және шетелдік профессорларды тарту болып табылады. Қозыбаев университеті үнемі шетелдік мамандарды тартады. Бұл жолы университет Түркиядан келген оқытушы Гёктюрк Джебеджиоглумен кездесу өткізді. Енді оқытушы ТжӘИ «Герман-роман филология» кафедрасында түрік тілінен сабақ береді. Гёктюрк Джебеджиоглу  Қазақстан мен Түркия үкіметтері арасындағы білім беру саласындағы ынтымақтастық туралы келісім аясында келіп отыр. Шетелдік маманның оқытушылық жұмысында 20 жылдан астам үлкен тәжірибесі бар. Ол филология саласындағы магистр және доктор дәрежесіне ие. Гёктюрк Джебеджиоглу Қозыбаев университетінде екі жыл бойы сабақ береді. Қазіргі уақытта университет тек студенттер үшін ғана емес, сонымен қатар оқытушылар үшін де тіл курстарын ұйымдастыру мүмкіндігін қарастырады.

Қозыбаев университетінде Алғыс айту күніне орай «Жерұйық», «Ангелы в тюбетейках» және «Приказано забыть»атты тарихи көркем фильмдері бойынша кинодәріс өтті. Іс-шараны «Қазақстан халқы Ассамблеясы» кафедрасы, №17 ҰӨОМК және СҚО Білім басқармасының әдістемелік орталығы ұйымдастырды. Университеттің барлық факультеттерінен 350-ден астам студент қатысты. Бағдарлама барысында көрермендер үшін «Қызықты адамдар клубы» подкастының үзіндісін, ҚХА кафедрасының меңгерушісі Людмила Гривенная «Жерұйық» тарихи драмасын ұсынды. Неміс халқын Қазақстанға депортациялау тақырыбында №17 ұлттық өркендеу орта мектеп-кешенінің ұлттық бөлімшелерінің басшысы Н. П. Кавун баяндама жасады. Тақырыптың жалғасында «Ангелы в тюбетейках» фильмінен үзінділер ұсынылды. Бағдарламаның маңызды бөлігі шешендер мен ингуштарды депортациялау тақырыбына арналды. Профессор Ж. А. Ермекбаевтың «Халықтану» дәрісханасынан бейнематериал көрсетілді. Кинодәріс көрсетілімі «Приказано забыть» фильмінен үзінді мен студент Дениэль Эдиловтың өз отбасының тарихы туралы баяндамасымен аяқталды. Іс-шарадан кейін қатысушылар мен спикерлер пікір алмасты. Бұл студенттерге сұрақтар қоюға және тарихи оқиғаларды тікелей диалог форматында талқылауға мүмкіндік берді. Шара соңында «Караван добра и милосердия» атты эссе байқауының жеңімпаздары марапатталды.

Жаңа білімге қадам. Қозыбаев университеті Қазақстан шахмат федерациясымен бірлесіп «Бастауыш білім берудегі шахмат» кабинетін ашты. Ол теориялық және практикалық сабақтарды ұйымдастыруға мүмкіндік беретін қажетті құралдармен жабдықталған. Енді болашақ бастауыш сынып мұғалімдері – «Шахмат мұғалімі» білім беру модулін меңгеру мүмкіндігіне ие. Жоғары оқу орындарында қосымша кәсіптік даярлаудың мамандандырылған бағдарламасы шахмат теориясын оқуды педагогикамен, психологиямен және оқыту әдістерімен біріктіреді. Оқуды бітіргеннен кейін түлектер тиісті белгісі бар дипломдар мен жаттықтырушы сертификатын алады. «Бұл мұғалімдерді даярлаудың жаңа бағыты. Осындай мүмкіндік үшін Қазақстан шахмат федерациясына алғыс айтамыз. Балаларымыздың дамуы мен болашағы үшін ашылған  шахмат кабинеті -логикалық және стратегиялық ойлауды, есте сақтауды және зейінділікті дамытады. Сондай-ақ, 12 шахмат жинағын ұсынған серіктесіміз Freedom Bank-ке алғысымызды білдіреміз. Жаңа Конституцияның қабылдануы ел дамуындағы білім берудің, ғылымның және инновацияның басымдығын нығайтады», - деп атап өтті Басқарма Төрағасы - Ректор Ербол Исақаев. Қазақстан шахмат федерациясы ПФ екі оқытушыға тегін мамандандырылған оқытуды өткізді. Олар шахматты оқытудың заманауи технологияларын, бастауыш сынып оқушыларында логикалық ойлауды дамыту әдістерін және шахматты білім беру процесіне енгізудің халықаралық тәжірибесін зерттеп, аяқтағаннан кейін тиісті сертификаттарды алды. Енді олар Қозыбаев университетіндегі жаңа сыныпта студенттерге сабақ береді. «Бұл бастаманы көптеген университеттерге ұсындық. Алайда Қозыбаев университеті  бірден жауап беріп, бағдарламамызды білім беру процесіне енгізуге мүмкіндік берді. Біздің мақсатымыз - интеллектуалды ұлтты қалыптастыру.Сонымен қатар осындай мүмкіндікті шалғай ауылдардағы мектеп оқушыларына ұсынғымыз келеді. Сондықтан біз шахматты мектеп бағдарламасына енгіздік. Енді университеттерде мамандарды даярлау маңызды», - деді Қазақстан шахмат федерациясының ЖОО жұмыс  жөніндегі үйлестірушісі Ақжүніс Артықбай. Биыл 55 студент екі семестр бойы «Шахмат мұғалімі» білім беру мамандығы бойынша оқуды бастайды. Болашақта педагогика мамандығы бойынша оқитын барлық студенттерге шахмат мұғалімі болуға дайындауға бағытталған шағын біліктілік ұсынылады.

Іс-шара конституциялық реформаларды талқылау аясында бизнес және ғылыми қауымдастық өкілдерінің басын қосты. Кездесуге ҚР ҒЖБ министрі, СҚО әкімі, жоғары және орта арнаулы оқу орындарының, ғылыми қауымдастықтың, аймақтық бизнес өкілдері және студенттер қатысты. «Ғылым және технологиялық саясат туралы жаңа заңда біз ғылымды қаржыландыру жергілікті бюджеттерден қамтамасыз етілуі мүмкін деп қарастырдық. Президент ғылымды қаржыландыруды ЖІӨ-нің 1%-ына дейін арттыру мақсатын қойды. Конституция жобасында ғылымға, инновацияға және білім беру жүйесіне басымдық берілген. Біз аймақтық университеттердің дамуын ілгерілету үшін жұмыс жасап жатырмыз. Аризона университетімен серіктестігіміз тек академиялық салада ғана емес, сонымен қатар ғылыми салаларда да табысты болып келеді. Айқын мысал ретінде, Күкіртті полимерлеудің бірлескен жобасын айтамыз. Біздің басты мақсатымыз- ғылымды мүмкіндігінше қолдану және аймақтық экономикаға пайда әкелу», - деп атап өтті министр Саясат Нұрбек. «Біз ҚР Ғылым және жоғары білім министрлігінің, Мемлекет басшысының тапсырмаларын орындауға  бағытталған тиімді тәсілдерін байқадық. Бұрын ғылымды қаржыландыру 300 млн.теңгені құраған және1,3 млрд. теңгеге дейін арттырылған. Бұл жақсы нәтиже. Биылдан бастап біз облыстық бюджеттен қаржыландыруды да жоспарлап отырмыз», - деді Солтүстік Қазақстан облысының әкімі Гауез Нурмухамбетов. Қатысушылардың пікірінше, аймақтың одан әрі тиімді дамуы өндіріс, ғылым және үкімет арасындағы тығыз байланыс арқылы жүзеге асады. Мұндай ынтымақтастықтың тиімді мысалы - Tomorrow School өңірлік кампусының қызметі шеңберінде СҚО мекемелері мен кәсіпорындарының тапсырысы бойынша Қозыбаев университетінің студенттері іске асыратын ЖИ-жобалар болып табылады. Бұл жобалар Кеңес мүшелеріне таныстырылды. Облыстық Полиция Департаментінің қатысуымен қалааралық көлікті бақылауға арналған қауіпсіз «Scroll» қосымшасы және азаматтардың сауалдарына жауап берудің автоматтандырылған жүйесі әзірленді. KDL Raduga компаниясымен бірлесіп, өндірістік деректерге негізделген өнім ақауларын автоматтандырылған анықтау қосымшасы жасалды. Қазіргі уақытта Солтүстік Қазақстан облысындағы жол-көлік оқиғаларының интерактивті ЖИ картасы әзірленуде. Жоба Солтүстік Қазақстан Прокуратурасымен бірлесіп жүзеге асырылады. Қонақтар Kozybayev Labs кешенімен танысты, «Агрохимиялық аналитика» және «Су сапасын бағалау» зертханаларын аралады. Зертханалар үшін 938 млн. теңгеге бағаланған жабдықтар  БМҚ жобасы аясында сатып алынды. Өңір ішінде  бұл жабдықдың баламасы жоқ. Ол ауылшаруашылық жемінің сапасын бағалауға, сондай-ақ тұқым дақылдарын, мал шаруашылығы өнімдерін және топырақ құнарлылығын талдауға мүмкіндік береді. Университет ауыл шаруашылығы тауарын өндірушілерге талдаудың осы түрлері бойынша қызмет көрсетуді көздейді.   «2021- 2025 жылдары университеттегі ҒЗТКЖ қаржыландыру көлемі он есе өсті, ал жалпы табыстағы зерттеулердің үлесі 2,8%-дан 14,5%-ға дейін өсті. 2025 жылы жалпы бюджеті 1 310 424 млн. теңгені құрайтын 12 ғылыми жоба жүзеге асырылды, жалпы сомасы 2 млрд. теңгеден асатын тағы 19 жобаға өтінімдер берілді. Коммерцияландыру саласында аймақтық кәсіпорындармен бірлесіп 1,7 млрд.теңгеге өтінім берілді , оның 412 млн. теңгесі жеке инвестициялар. Бұл университетке елдегі ең үздік бес ЖОО қатарына кіруге және облыстар арасында 7-ші орын алуға мүмкіндік берді», - деді Басқарма Төрағасы – Ректор Ербол Исақаев. Шара қорытындысы бойынша 66 кәсіпорынмен ғылым, білім және бизнес серіктестігін нығайтуға бағытталған салалық консорциумдар құру туралы келісімдерге қол қойылды. Сондай-ақ жоғары оқу орнының базасында Академиялық және зерттеушілік артықшылық орталығы қалыптастырылуда.

Жоғары оқу орны қаламыздың мектеп бітіруші сынып оқушыларына арналған ашық есік күні шарасын өткізді. 170-ке жуық бала жаңа оқу-зертханалық корпустағы заманауи зертханалармен танысып, студенттермен әңгімелесті. Талапкерлерге біздің университетте оқу перспективалары: білім беру бағдарламалары, академиялық ұтқырлық, Қазақстан мен шетелдің жетекші профессорларынан оқыту, шығармашылық жобаларды іске асыру, Қозыбаев университеті мен Аризона университетінің қос дипломдық бағдарламалары туралы айтылды. Университеттің факультеттері мен кафедралары, студенттік ұйымдар мен шығармашылық бірлестіктер өз презентацияларын ұсынды. Шараның интерактивті бөлімін асыға күтетін оқушылар би және музыкалық байқауларға қатысты. Жеңімпаздар мен жүлдегерлер демеушілерден сыйлықтар алды. Қабылдау және рекрутинг кеңсесінің жетекшісі Гүлмира Оспанованың айтуынша бұл жолы қаламыздың 6 мектебінен келген оқушылар өздерін шынымен болашақ студент ретінде сезінуге мүмкіндік алды: «Біздің міндетіміз-балаларды бағдарлау. Болашақ студенттерімізге білім алу мүмкіндіктерін көрсетіп, ЖОО-мен таныстыру. Оларға сұранысқа ие білім беру бағдарламалары, академиялық ұтқырлық туралы ақпарат берілді». Сондай-ақ, оқушылар оқуға түсу, жатақханада тұру, жеңілдіктер, стипендиялар мен гранттар бойынша толық кеңес алды. Ашық есік күндері келесі аптада жалғасады.

Солтүстік Қазақстан облысының ғылыми, шығармашылық және білім беру қауымдастықтары «Әділетті және прогрессивті Қазақстанның халықтық Конституциясы үшін» жалпыұлттық коалицияға қосылды. Кездесуге ҚР Премьер-Министрінің орынбасары- Мәдениет және ақпарат министрі Аида Балаева, Сенат және Мәжіліс депутаттарының, жергілікті атқарушы органдардың, Қозыбаев университетінің басшылығы, қызметкерлері және оқытушылары, сондай-ақ аймақтың ғалымдары және мұғалімдері қатысты. Жаңартылған Конституция жобасы – ел дамуының стратегиялық бағытын айқындайтын, негізгі қағидаттар мен ұлттық құндылықтарды жүйелейтін маңызды құжат. «Конституцияның арқасында біз қарқынды дамып келе жатқан мемлекетке айналдық. Бүгінде Қазақстан халықаралық қауымдастықтың құрметті мүшесі болып табылады. Конституцияның кіріспесінде: Қазақстан демократиялық, зайырлы және құқықтық мемлекет екені анық көрсетілген. Сондықтан мемлекет әрқашан өзінің әлеуметтік міндеттемелерін орындайды. Тіпті жекеменшік университеттер мемлекеттік гранттардың арқасында тегін білім береді. Бізде сақтандыру жүйесі бар және тегін медициналық көмек қолжетімді», - деп атап өтті ҚР Премьер-Министрінің орынбасары- Мәдениет және ақпарат министрі Аида Балаева. Қозыбаев университеті Солтүстік Қазақстан облысындағы жалғыз жоғары оқу орны ретінде үлкен мүмкіндіктерге ие. «Қазіргі таңда біздің оқу ордамыз серпінді және тұрақты тұрде дамып келеді. Петропавл қаласы өңірдің сенімді академиялық орталығы ретінде қалыптасып келеді. Бізде Қазақстанның барлық өңірлерінен және 17 елден студенттер білім алады. Аризона университетімен стратегиялық серіктестігіміздің маңыздылығын ерекше атап өткім келеді. Бүгінде Солтүстік Қазақстан облысындағы Петропавл қаласы 1200-ден астам студентке әлемдік деңгейдегі білім мен бірігей мүмкіндіктерді ұсынып отыр», - деп атап өтті Қозыбаев университетінің Басқарма Төрағасы-Ректоры Ербол Исақаев. Бұл құжат азаматтар мен мемлекет арасындағы өзара сенімнің, жауапкершіліктің және серіктестіктің айқын көрінісі. Конституцияда бекітілген қағидаттар қоғамның бірлігін нығайтып, әр адамның құқығы мен қадір-қасиетін қорғауға бағытталған

Петропавлда қысқы Президенттік көпсайыстан Қазақстан чемпионаты өтті. Солтүстік Қазақстан облысының құрамасында университетіміздің студенттері өнер көрсетті.  Спортшыларды жаттықтырушы, аға оқытушы Александр Наумов дайындады. Нәтижесінде біздің студенттер 5 медаль жеңіп алды: 3 алтын, 1 күміс және 1 қола. 18-20 жас аралығындағы топта бірінші орынды Жанель Нуралина жеңіп алды (ФКС-25 -3). Медет Жуманов екінші орын алды (гр.ФКС-24 -2). Осы жас тобында республикада үшінші орынды Алихан Тастанбеков иеленді. 21-23 жас санатында Данила Свиржевский алтын медаль жеңіп алды (ФКС-22 -1). Ардагерлер тобында  Наумов Александр Владимирович  жеңіс тұғырын бағындырды. Осылайша ол 58 дүркін ел чемпионы болды. Студенттер мен жаттықтырушыны құттықтаймыз!

Қозыбаев университетінің командасы ҚР ҒЖБМ делегациясының құрамында Министр Саясат Нұрбек бастаған «ҚазМұнайГаз» ҰК АҚ Басқарма Төрағасы Асхат Хасеновпен кездесті. Бүгінде ең ірі ұлттық мұнай-газ компаниясы ғылыммен байланысын жүйелі түрде нығайтады. Геология, кен орындарын игеру және мұнай-газ химиясын, 80-ге жуық ғылыми саланы қамтитын ҒЗТКЖ жол картасы әзірленді. Қазірдің өзінде 35 жетекші университетпен ынтымақтастық орнатылған. Біз үшін  Аризона университетінің ғалымдарымен бірлескен күкірт құрамдас полимерлерді әзірлеу жобасын талқылау өте маңызды. «Қазақстанның күкірт қоры мол. Cондықтан біз бұл ресурсты қосылған құны жоғары өнімге айналдырудың жаңа тәсілін қалыптастырып жатырмыз. University of Arizona және Kozybayev University мамандарымен серіктестік озық ғылыми әзірлемелерге жол ашып, зерттеуден бастап кадр даярлауға, шешімдерді пилоттық енгізуден оларды ауқымдандыруға дейінгі толыққанды экожүйе құруға мүмкіндік береді. Жаңа материалдар мен тыңайтқыштардан бастап металл өндіру технологияларына дейінгі кең ауқымда қолданылатын бұл жоба күкіртті қайта өңдеудің экологиялық мәселелерін де қатар шешеді », - деді ҚР ҒЖБМ Саясат Нұрбек . Жобаны үш бағытта жүзеге асыру жоспарланған: күкірттен жоғары технологиялық пластмассаларды өндіру, инновациялық тыңайтқыштар және кеннен қалдық бағалы металдарды алу үшін күкіртті пайдалану. Әлемге әйгілі ғалым Джеффри Пьюн бастаған халықаралық зерттеушілер тобы балқытылған күкіртті полимерлерге және инфрақызыл линзалар, литий-күкірт батареясының компоненттері, коррозияға қарсы жабындар және баяу бөлінетін тыңайтқыштар сияқты жоғары құнды өнімдерге айналдыратын озық кері вулканизация технологиясын әзірледі. Технология 11 патентпен қорғалған, 50-ден астам ғылыми басылымдармен расталған және айтарлықтай коммерциялық әлеуетке ие. Біздің еліміз үшін бұл жоба ерекше өзекті. Себебі Қазақстан жылына шамамен 4,3 млн тонна өндіретін қарапайым күкірт өндіру бойынша әлемде 7-ші орында. Дегенмен, күкірттің артық жиналуы, экологиялық қауіп тудырады. Осыған байланысты шикізат экспортынан қосылған құны жоғары Инновациялық, күкірті бар материалдарды терең өңдеуге және өндіруге көшу міндеті барған сайын маңызды бола түсуде.